ბერძნული და მართლმადიდებლური კულტურის ხელშემწყობი ორგანიზაციის „ენაოსის“ მიერ ორგანიზებულ ღონისძიებაზე უკრაინის ავტოკეფალიასა და რუსეთის ომზე უკრაინის წინააღმდეგ დისკუსია შედგა.
მსოფლიო პატრიარქმა ბართლომეოსმა ვიდეომიმართვაში ხაზგასმით აღნიშნა, რომ უკრაინის მართლმადიდებელი ეკლესიისთვის ავტოკეფალიის მინიჭებას გეოპოლიტიკურ ფაქტებთან და რუსეთის მიუღებელ შეჭრასთან უკრაინაში არანაირი კავშირი არ აქვს.
მან აღნიშნა, რომ ომს რუსეთის ეკლესია ხელოვნურად უკავშირებს უკრაინის ავტოკეფალიას, რათა დაფაროს თავისი მოვალეობები და დიდი ამბიციები.
„სწორედ რუსეთმა გააღრმავა უფსკრული უკრაინელებსა და რუსებს შორის და არა უკრაინის ავტოკეფალიამ, რომელიც მიენიჭა ტანჯულ უკრაინელ ხალხს. რუსეთის რეაქცია მომდინარეობს უკრაინელ ხალხზე თავს მოხვევის მცდელობიდან და ჯანსაღი საეკლესიო სინდისის უქონლობით“.
მსოფლიო პატრიარქმა ხაზგასმით აღნიშნა, რომ კონსტანტინოპოლის ეკლესიამ დახმარების ხელი გაუწოდა რუსეთს უკრაინის საკითხის მოგვარებაში, მაგრამ მცდელობებმა შედეგი არ გამოიღო რუსული მხარის გამო, რომელიც მას არ ცნობს.
„მოსკოვის ეკლესიის ხელმძღვანელობა ცდილობს დააწესოს ახალი ეკლესიოლოგია, რომელიც არღვევს საეკლესიო სისტემას ახალი მონაცემების საფუძველზე. მაგრამ მას უნდა ესმოდეს, რომ მართლმადიდებლობის ერთიანობის ერთადერთი გარანტია მსოფლიო საპატრიარქოა. მსოფლიო საპატრიარქოს გარეშე მართლმადიდებლობა ჩავარდება ნაციონალიზმების მორევში, თვითკმარობის ინტროვერსიაში, თანამედროვე სამყაროს ზიზღში“ – განაცხადა ბართლომეოსმა.
მან დასძინა, რომ რუსეთის ეკლესია კვლავაც ადანაშაულებს მსოფლიო საპატრიარქოს მართლმადიდებლურ ურთიერთობებში დაძაბულობის გამო და „ეს არის რუსეთი, რომელიც ქმნის დაძაბულობას, რომელიც არაკანონიკურად შევიდა ალექსანდრიის საპატრიარქოს იურისდიქციაში და აფუჭებს ქრისტიანობის სამყაროს თვალში მართლმადიდებლობის იმიჯს საქართველოში“.
თავის ვიდეომიმართვაში მსოფლიო პატრიარქმა ხაზგასმით აღნიშნა, რომ რუსეთის ეკლესიის ხელმძღვანელობას მიაჩნია, რომ მსოფლიო საპატრიარქოს ჩარევამ მართლმადიდებლობაში განხეთქილება შექმნა.
„ჩვენთვის ეს სიმართლეს არ შეესაბამება. ავტოკეფალიის მინიჭება მნიშვნელოვანი წვლილია მართლმადიდებლობის, როგორც მართლმადიდებლური ეკლესიოლოგიის და მრავალსაუკუნოვანი საეკლესიო პრაქტიკის პრაქტიკული გამოხატულების ერთიანობაში.
სწორედ რუსეთის ეკლესიის ქმედებები ემუქრება მართლმადიდებლობის ერთიანობას და არა მსოფლიო საპატრიარქოს პასუხი უკრაინელი ხალხის თხოვნაზე“ – განაცხადა მსოფლიო პატრიარქმა.
მან ხაზგასმით აღნიშნა, რომ პაპობაზე პრეტენზია აქვს რუსეთის ეკლესიას და არა მსოფლიო საპატრიარქოს.
„მოსკოვი არ ცნობს უკრაინელების უფლებას ავტოკეფალურ ეკლესიაზე, რადგან სურს მათი ჩაგვრა, სურს მართლმადიდებლობა გადააქციოს ეკლესიების კონფედერაციად, რათა ჰქონდეს ხმის უფლება. მისი ღიად ამპარტავანი და ჰეგემონური მენტალიტეტი ხაზს უსვამს მსოფლიო საპატრიარქოს მთავარ როლს მართლმადიდებლურ დისკურსში.
უკრაინის ავტოკეფალია ეკლესიის დასრულებული ფაქტია და შეუძლებელია მისი გაუქმება პროპაგანდით და ომით. რუსეთის ეკლესია დაუნდობლად მისდევს მატრიციდს. ჩვენ ყველანი ვართ უკრაინის მიწაზე დატრიალებული კატასტროფის მოწმე. სასწრაფოდ უნდა მოხდეს ცეცხლის შეწყვეტა“.
მან მოუწოდა ყველა მართლმადიდებელ ავტოკეფალურ ეკლესიას, რომლებსაც ეს ჯერ არ გაუკეთებიათ, გააგრძელონ უკრაინის ავტოკეფალური ეკლესიის აღიარება.
„მოვუწოდებთ ყველა მართლმადიდებლურ ავტოკეფალურ ეკლესიას, რომლებსაც ეს ჯერ არ გაუკეთებიათ, განაგრძონ აღიარება და ამით გამოხატონ თავიანთი მხარდაჭერა ტანჯული უკრაინელი ხალხის მიმართ და რუსეთის ეკლესიას ბოდიში მოახდევინონ იმის გამო, რაც მან მართლმადიდებლობას მიაყენა.
ომისა და ავტოკეფალიის მინიჭების დაკავშირებაზე მინიშნებები ავადმყოფური ფანტაზიის ნაყოფია იმ დანაშაულის დასაფარად, რომელიც ახლა უკრაინაში ხდება.
მართლმადიდებელი უკრაინელი ხალხი არასოდეს დათანხმდება, რომ მათმა ეკლესიამ გააგრძელოს მოსკოვის საპატრიარქოსადმი დამორჩილება, რომელმაც აკურთხა მათ სამშობლოში შეჭრა” – აცხადებს ბართლომეოსი.
